انصار ( د تله ۵ مه) پاکستان ادعا کوي چې په روان سپټمبر میاشت کې یې ۲۱ پوځیان وژل شوي او د هغو درو تنو وسله والو مخالفانو په شمول چې پرون (سې شنبې) په خیبر پښتونخوا ایالت کې ووژل شول، ۳۶ وسله وال حمله کوونکي یې وژلي دي.
د ترکیې انادولو خبري اژانس وايي، د پاکستان د پوځ له خبرپاڼې سره سم، پرون د افغانستان پولې ته نژدې د خیبر په تیرا سیمه کې د ټي ټي پي د یوه قوماندان کفایت تور په ګډون ۳ وسله وال ووژل شول.
د پاکستان پوځ ادعا کوي چې په روان سپټمبر کې یې د خیبر پښتونخوا کې په ۶ جلا - جلا بریدونو کې ۳۶ سختدریځي وژلي دي.
د پاکستان د پوځ پر اساس، لږترلږه د دوی ۲۱ پوځیان د وسله والو په بریدونو کې وژل شوي دي.
د سپټمبر په ۶ مه د پاکستان د پوځ پر اساس په چترال کې د سلګونو وسله والو طالبانو په برید کې څلور پاکستاني پوځیان ووژل شول خو طالبانو بیا د لسګونو پاکستاني پوځیانو د وژلو ادعا وکړه. پاکستان د طالبانو د اکثرو بریدونو په اړه څه نه وايي او رسنۍ یې هم تر کلک کنټرول او سانسور لاندې ساتلې دي.
د پاکستان پوځ عموماً هغه مهال پر خپلو ځواکونو د ټي ټي پي د حملو یادونه کوي چې د ټي ټي پي غړیو ته یې مرګ ژوبله اړولې وي.
URL تعقيب: https://www.ansarpress.com/pashto/27274
